Maande lank het my vinger gehuiwer op die bestelknoppie wanneer ek die boekbeskrywing op Amazon.com en Kalahari.com gelees het. Verlede week het ek uiteindelik toegegee tot die versoeking en die digitale weergawe van die boek aangeskaf. My nuuskierigheid het eenvoudig die oorhand gekry. Ten spyte van alles wat ek hier kwytraak, is ek geensins spyt oor my aankoop nie.
Dis altyd moeilik om ’n resensie oor ’n boek te skryf en ek is geen resensent nie. Volgens JB Roux se artikel in Rapport is my eie skryfwerk vrot van die taalgoggas en die stories voorspelbaar. So hierdie is nie uit die oogpunt van ’n skrywer geskryf nie, maar uit die oogpunt van ’n leser.
Maanvrug is nie ’n boek vir kloosterkoeke nie. Baie mense beweer dis ‘n Afrikaanse 50 Shades, maar Maanvrug is gepubliseer nog voordat die Engelse boek die lig gesien het en in my nederige opinie, baie beter geskryf.
Jy moet oopkop wees as jy die boek lees en heeltyd besef dat die meeste van die tonele fantasieë is van die hoofkarakter. Die boek handel oor Selene se soeke na seksuele bevrediging – binne en buite die huwelik. Haar fantasieë betrek meestal vreemdelinge terwyl sy emosioneel steeds van haar man se liefde en goedkeuring afhanklik bly.
Annelise slaag daarin om die leser van die eerste bladsy te betrek by die stryd wat Selene voer om haar eie seksualiteit te ontdek. Sy skryf sonder doekiesomdraai en mens kan nie anders as om die hoofkarakter met tye effe te bejammer nie. Dit is nie ’n maklike pad wat sy gekies het om te stap nie.
Sommige van die fantasieë het my as leser ongemaklik gestem, maar dit kan ook wees omdat ek jare lank as staatsaanklaer en landdros werksaam was. Dominansie op seksuele gebied is aanvaarbaar binne perke. Ongelukkig het ek enkele tonele as te gewelddadig en vernederend ervaar om dit te geniet.
In die geheel beskou het die boek egter geslaag om my gebonde te hou tot op die laaste bladsy. Wees gewaarsku, indien jy die boek begin lees gaan jy dit moeilik neersit. Mens moet eenvoudig uitvind hoe dit eindig. En hou maar ’n koue dingetjie naby wanneer jy dit lees.
Ter opsomming:
Erotiese waarde – 9/10
Skryfstyl – 10/10
Herleeswaarde – 6/10
Maanvrug is ook beskikbaar by onder andere Kobo, Leserskring en mybooks.co.za.
